A xogadora do RCTC grava o seu nome como vencedora no puño de prata da popular raqueta de madeira que dá nome ao trofeo por terceiro ano consecutivo
A edición deste ano do Trofeo Raqueta de Madeira e Prata Jael Joyería foi a de máis alto nivel competitivo celebrada até a data. Nas pistas de terra batida do Real Club de Tenis Coruña déronse cita xogadores chegados de toda España e de Europa.
Eric Vanshelboim (xogador ucraíno con ránking 426 ATP) e Eva Álvarez Sande (xogadora do RCTC e de Washington State University) impuxéronse ao santiagués Rafael Izquierdo (tamén xogador do RCTC e de North Carolina State University) e á barcelonesa Judith Hernández (actual campioa absoluta de Cataluña e xogadora da academia Next-Level).
Con máis de 6000€ de premios en metálico, o torneo destacou non só pola súa calidade tenística senón tamén polo nutrido número de participantes. No cadro masculino, que necesitou dunha fase previa, o gañador mostrou gran superioridade nas primeiras roldas pero tivo que elevar ao máximo o seu rendemento para imporse na final por 6/2 e 6/4 a Rafa Izquierdo, que tivo varias bólas para igualar o partido 5 a 5 na segunda manga.
A igualdade foi a nota predominante no cadro feminino, con 8 xogadoras asiduas do circuíto profesional ITF-WTA. A gañadora, Eva Álvarez, tivo que superar á madrileña Carmen Gallardo despois dun partido de tres horas nos cuartos de final. En semis, enfrontouse a outra galega, Celia Cerviño (cabeza de serie número 1 e ránking 500 WTA en 2022), para pechar noutra maratoniana final que acabou 7/5-3/6-6/2 contra Judith Hernández.
Na categoría júnior, puntuable para o rating UTR, Yeray Quián (tamén xogador do RCTC) proclamouse campión ao vencer aos madrileño Marcos Ramos na final. As categorías xuvenís e veteranas, con máis de 130 participantes, disputaranse durante toda esta semana e celebrarán os seus finais o sábado 1 de xullo.
O Real Club de Tenis Coruña e Jael Joyería consolidan estas dúas semanas de tenis de alto nivel no calendario, e sitúanse como unha das probas de referencia con dobre cadro (feminino e masculino) do circuíto IBP en España.
